今日係結婚過程中其中一個重要日子，就係過大禮嘞！
一朝早未夠 9 點，啲嫁女餅已經送到我屋企了，總數有120斤，因為我地係住圍村，按傳統習俗要派 "門頭"，即係每戶都要派，我媽咪就決定每戶派 2個雞蛋糕，其他摯親好友就合共派六個，當中包括雞蛋糕 2個，紅綾、黃綾、欖仁合桃酥及白餅每款一個，至於派門頭呢個任務就要麻煩幾位鄰居阿姨、婆婆幫手了，佢地都係睇住我長大的，見我終於肯嫁 (其實係終於嫁得出) 都好替我開心，嗰日真係好多謝佢地嘅幫忙呢！
派門頭前，媽咪先用幾個喜餅來拜祖先，正式向各位先人宣佈佢個心肝 (即係我呢個細女) 終於要嫁人了，我問媽咪有冇依依哦哦話比公公知我要嫁啦？佢話有，仲話公公知道一定好開心好安慰，又話公公最錫就係我，如果公公依家仲在生，可以親眼睇著我出嫁就好嚕~
一箱箱嘅嫁女餅準備出發了~
阿姨們出發之後，我同媽咪就好努力咁喺屋企將其他喜餅分成一袋袋，晏啲親戚朋友來到就可以派比佢地啦~
我未來老公在吉時 11點後到達，當時我屋企已經聚集了超過 10個 Auntie 响度，真係好熱鬧呀，古古搵咗佢舊拍檔阿添幫手，入到黎媽咪就叫我爸爸去收禮，收咗聘禮就代表正式應承呢頭親事了~
睇下媽咪個樣幾緊張！
生果 & 禮餅放好在神檯前準備拜祖先~
禮成後除了回返一半禮俾男家，女家仲準備咗大發糕餅 、蓮偶 & 媽咪親手做的煎堆，取其佳偶天成及金銀滿屋之意！不過……媽咪可能真係太緊張了，下面所講嘅回禮佢竟然唔記得交比古仔，要佢地揸架車番轉頭來取呀，肯好佢地剛剛走了不太遠咋！
以下就係女家收嘅禮嘞~
今日仲要好多謝家姐、姐夫、阿哥、阿嫂、契婆、契舅父舅母、四嬸、堂弟們專程來我家吃喜餅，能夠得到佢地嘅祝福，相信我地嘅婚禮一定可以順順利利啫！
過大禮順利完成後，我地就朝著屬於我地嘅 1213 進發了~
- 留言者: suki
- 日期: 2009-11-30 14:18:00
[版主回覆12/01/2009 13:16:00]我老公好合作，無咩怨言喎，最緊要事前大家有商有量就問題啦~
- 留言者: 兩公婆
- 日期: 2009-11-28 10:49:00
[版主回覆12/01/2009 13:15:00]大同係我媽咪指家架，佢話好食啲喎~
祝妳順順利利啊~
- 留言者: san
- 日期: 2009-11-27 17:21:00
我媽咪個日都好驚張呀!
[版主回覆12/01/2009 13:14:00]都 ok 多嘢架，其實我媽咪有話過簡簡單單就得嘅，不過我覺得始終結婚係一生人一次，呢啲傳統禮儀我希望儘量跟足啲，難得我老公又好配合，所以我都好多謝佢~
，姊妹話過完大禮時間會過得特別快，因為過完大禮就可以派帖，之後陸陸續續會收到回覆，跟著會忙著執埋個 seating plan，好快就會到大喜日子架啦~