2010 Merry Christmas !

2010-12-26 (星期日)

祝各位聖誕快樂呀！

 

今日係 Boxing Day，老公要返工，不過請左半日陪我食飯，好…等我煮返餐比你食啦

 

 

 

2010-12-21 老公 pre-birthday dinner

2010-12-21 (星期二)



事隔三個幾月啦，太多太多特別日子未記錄低。。

趁最近得閒啲，要努力啲追返出之前嘅 Blog 先得啦。。

因為遲啲應該會幾忙啦。。



老公生日正日係冬至，所以每年都唔能夠同佢二人世界慶祝 (除咗 09年 Honey Moon 在北海道渡過之外)，今年我特登喺前一日請假陪佢。。

第一個節目：去奧海城睇 Harry Porter ，呢集係結局篇 Part I ，Part II 好似要 2011 年暑假先上，我覺得呢集麻麻地好睇咋，有啲悶‧‧‧下一集應該會精彩緊湊好多。。

睇完戲。入去愉景灣食飯。

Dinner @愉景灣 Zaks for Birthday Dinner

差唔多兩個星期前就訂定位啦，仲訂埋生日蛋糕添 (查實係布甸，下面再詳細講)，第一次入愉景灣，一早就研究定坐咩車入去，上網搵到東涌有架巴士入去，車程差唔多成 45分鐘，坐地鐵途中，老公話應該欣澳會有巴士入去喎，果然，去到欣澳站時望下站外真係有架巴士入去呀，兩公婆立刻落車啦，由欣澳入去只需20分鐘左右咋，快好多呢！

入到去，仲未天黑呀，我訂咗位 7:00pm ，見未夠鐘，當然要影下相先啦。。

喺碼頭對開有棵好高嘅聖誕樹，好靚呀。。

呢度環境真係唔錯，唔怪得 Openrice 咁多人推介嚟呢間啦。。環境同氣氛真係 so good 呀。

我哋就係坐呢度嘅 outdoor 位啦，可以睇到迪士尼煙花。。

D-Deck 附近嘅夜景都好靚呀，仲好浪漫添 。。

好喜歡老公呢張相呢，我覺得好型囉，哈哈，因為係我影架嘛。。。

入夜後聖誕樹又有另一番景致。。

7:00PM 左右，終於入座準備開餐啦，我地呢個位置真係好正啦。。

睇下我哋 order 咗啲咩美食先。。

‧‧洋蔥湯

‧‧南瓜沙律

‧‧Pasta Porcini

‧‧Mini Baby Back Rib

‧‧Chocolate Pudding as Birthday Cake ~ 訂位時已落定 order 。佢哋會因應要求。在甜品碟上寫上祝福句語。

老公 ~ 祝你生日快樂，心境外貌永遠年輕，最緊要係身體健康啦。。

坐到 8 點幾都未見到放煙花，都諗著今晚可能冇得睇啦，點知 9:30 pm 先開始放煙花呀，都幾靚架，睇埋煙花，今日嘅慶祝活動就晝上完滿句號啦。

第一次整蛋糕~~愛心生日蛋糕送比老公

2010-12-20 (星期日)

12月22日係老公生日

今年想試下親手整蛋糕送比佢

其實之前一路都想試下整啲簡單又唔使焗嘅蛋糕架

但又懶、又無工具

最近終於問家姐借咗啲工具

老公陪我買埋啲材料

開始整我人生第一個蛋糕啦

 

响 下面呢個網搵到呢個食譜好耐啦，終於大派用場

http://www.rthk.org.hk/elearning/dessert/cake_bbcheesecake.htm

 

★ 藍莓芝士蛋糕 ★

材料： (6 吋蛋糕模)
消化餅底
消化餅…………………………………………………………………………5 塊
淡牛油…………………………………………………………………………30g
芝士餡料
忌廉芝士………………………………………………………………………250g
糖………………………………………………………………………………60g
淡忌廉…………………………………………………………………………220g
魚膠粉…………………………………………………………………………2 茶匙
水………………………………………………………………………………2 湯匙
藍苺果醬………………………………………………………………………60g
飾面:
鮮藍莓(或合時鮮果) …………………………………………………………適量
藍莓果醬……………………………………………………………………….適量
 

做法：
(1) 將消化餅壓碎，加入牛油溶液拌勻，壓實於蛋糕模內雪凍備用。

(2) 淡忌廉6 分打發備用。

(3) 忌廉芝士加糖打滑至糖溶解，加入藍莓果醬拌勻。

(4) 魚膠粉加水，隔熱溶解，加進芝士餡內，再加入已打起的淡忌廉攪勻，
倒入消化餅底內，放入雪櫃凝固。

(5) 脫模後用鮮藍莓(或合時鮮果)及藍莓果醬裝飾便成。

 

哈哈‧‧‧賣相都 OK 掛，不過可能魚膠粉唔夠，個蛋糕唔夠實淨，好軟身下，希望下有機會再整時會整得好啲啦，下次我想整士多啤梨慕絲呀~

 

2010-12-12 & 13 結婚一週年之旅~東部華僑城 Day 2

2010-12-13 (星期一)



起身先落餐廳食番個豐富嘅早餐‧‧

兩個都瞓到眼腫面腫呀，哈哈‧‧

Lobby & 餐廳都好靚啦‧‧我覺得 ~

食完早餐上返房攞行準備 Check Out ‧‧

將兩個背包寄存在 Reception 之後又再出動啦。。

坐覽車上半山‧‧

位處雲海高地嘅 "登峰造極" ‧‧

WOW!! 大霧到呢~ 係咩都睇唔到架‧‧

再吊車落返山腳，行下水母館，影下相‧‧感覺同香港海浪公園差不多。。

都幾多品種下。。

再行落海菲德小鎮，悠閒地四圍逛、四圍影，十分寫意啦。。

行到咁上下，入咗 Starbucks 嘆 coffee ‧‧

小插曲：

話說飲飲下咖啡，本小姐人有三急，於是去附近嘅洗手間解決啦‧‧

正當御甲時，手機竟然極速地由前褲袋飛咗出黎，更巧妙地從兩厠格的空隙間飛咗過去隔離個格到，大件事，聽到隔離剛剛有人入咗去，好驚比人順手牽羊呀，馬上大聲問隔離有無人呀？唉‧‧無人應添‧‧馬上加速完成後，再極速穿回老牛拉回拉鍊，走出去企响隔離厠格門口等，等咗一陣，有位國內同胞行出來，在她衫袋取出我部電話，問係咪我嘅，我緊係話係啦，又馬上唔該佢、多謝佢啦。。

真係好彩啦，真係真心多謝佢嘅，但我心又會諗，如果我再遲啲出黎，佢一定會攞咗部機走囉。。。









繼續行‧行‧行‧‧

行到酒店附近啦。

瀑布後面就係 "瀑布酒店" 啦，不過唔係我地住嗰間，我地嗰間係西翼，喺另一面，平啲架。。

開心愉快嘅結婚一週年之旅完成啦，

返 Reception 攞返兩個背包，就坐專車返香港啦。。

2010-12-12 & 13 結婚一週年之旅~東部華僑城 Day 1

2010-12-12 (星期日)



結婚一週年‧‧紙婚紀念日‧‧

我哋選擇去短線旅行慶祝‧‧

近近哋去東部華僑城玩兩日‧‧

一直想去好耐啦‧見朋友去玩‧影啲相好靚架‧‧



响康X 買咗套票，一早坐旅遊巴自行到沙頭角過關，口岸去東部華僑城嗰程有七人車專車接送呀，因為呢段時間只有我哋呢 pair 咋，舒舒服服咁 15分鐘左右就到達啦。



第一時間去酒店放低啲嘢先，幸運地仲可以提早 check in 添呀，不過就等咗好耐囉，因為勁多人 。。

Check in 時取了景點套票，可以响酒店特別通道入場，玩足兩日‧‧

呢度有兩大園區，分別係茶溪谷 & 大俠谷 ，我哋今日決定先玩茶溪谷，因為嗰邊風景應該靚啲呀。。



坐覽車上山。。

一出覽車就係雲中部落，今日唔係好大霧，但係天色都唔係太好呀，如果陽光普照嘅話，影出黎嘅相應該仲靚啲架。。

感覺像置身北海道花田一樣，哈哈，其實我未試過去北海道火賞花架，純粹想像架咋。。。

好美的向日葵‧‧‧

山丘上的小教堂，很精緻又不失莊嚴‧‧ 真係一個拍攝婚紗照嘅好地方呀。。

來到 " 茵特拉根 " 小鎮。。

繼續前往古色古香的 "茶翁古鎮"

山與山之間，由好多條吊橋來連接，我哋都唔夠時間行晒咁多條呢。。

搵咗好耐都搵唔到點行去 "三洲茶園" ，只好退而求其次，喺附近嘅茶樹梯田影下相啦。。

呢度地方真係太大啦，行咗幾個鐘，我諗我地行咗三分一左右咋，

行下行下，不經不覺就差唔多 5:00啦，要趕時間返去酒店嗰邊先得，如果唔係就無車搭架啦。

回程呢段我地選擇坐小火車再轉覽車

返到位處 "大俠谷" 嘅 "瀑布酒店西翼" ，本來想喺園區裡面搵食架，不過好多店舖都關門了，我哋又唔想特登打的出去食嘢，所以就選擇喺酒店食西餐，當係慶祝結婚一週年啦。埋單 200 幾，國內嚟講係貴咗啲，但係由於環境、氣氛、食物質素都唔錯，所以呢餐都食得好開心呀。。

酒店大堂、走廊、房間都以藍色為主，好有海洋 feel 呀。。

Package 裡面只有兩間酒店係唔使加錢嘅，呢間係其中一間，以我咁慳家嘅性格，緊係揀呢間啦，反正我同老公對酒店嘅要求一向都唔太高嘅，只要乾淨同舒適就可以啦。响 lobby 聽到有國內同胞嫌呢間酒店唔夠豪華、太家居 feel 咁話，我反而就係喜歡佢呢隻家居 feel 喎，幾有時代感，幾舒服呀。。

玩咗一日，係時候休息啦，下一篇繼續 結婚一週年之旅 Day 2