Story & Sammy & Nicole 的三人世界: 1月 2010

2010年1月28日星期四

出糧的日子!

公司同事最近都好期待的日子終於到了，今朝一早就有同事報料話我知已經出咗糧，至於點解咁大陣象？咪因為今次出埋年尾嘅 bonus 囉！

返到公司第一時間上網 check 下 account status，咦！真係出咗啦喎，而且都幾令人滿意添，對剛剛成為新一代 C9 嘅我真係有好大的鼓舞作用，因為可以預多啲 budget 去辦年貨，同埋可以孝敬四大長老丫嘛，當然亦要獎勵下自己啦~

2010年1月21日星期四

亞大生日快樂 (神話Andy都係同一日生日架)

2010-01-21

今日係我老公口中的亞大生日嘅大日子，在此祝佢生日快樂，開開心心！

尋晚買咗張生日咭準備送比佢，落 order 叫老公寫返幾句祝福嘅說話比亞大，哈哈，佢好乖咁尊稱亞大，然後署名亞二添，咁我咪即係享緊齊人之福？

好彩今日公司有車上大陸廠，可以跟車上埋份禮物比亞大，希望佢鍾意啦~

今日亦係我至愛神話成員之一 Andy 生日，Andy 今個月都去咗服兵役了，起碼兩年後先返嚟，响度都要同佢講聲生日快樂先，希望佢頂得順軍隊裡面難苦嘅訓練，成為一個不折不扣的男子漢啦，加油呀~

留言者:
Email: @yahoo.com
網址:
日期: 2010-01-29 20:35:00

人生有如洶湧的波濤,如果沒有岩石的阻擋，怎能激起美麗的浪花？　　　　　　　　　　　　　　　　　　　　　　　　　　 . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

留言者: 愛神話的人
Email: bbevaeva@yahoo.com.hk
網址:
日期: 2010-01-22 23:41:00

andy. 亞大 happy birthday^^

2010年1月8日星期五

20091213 大日子 Photo (by LB)

結咗婚接近一個月了，大日子當日的相及 Video 還未收到，暫時睇住好姊妹的 Husband 兼友情客串 Snapshot 攝影師 ~ LB 幫我哋影嘅靚相先啦~

花車公仔 ~ 我的至愛 Pooh Pooh

一大清早 8:00 左右，姊妹們已經準備就緒，一陣要好好 "招呼" 班兄弟呢！

P.S. 姊妹手花係我親手整架，還可以吧~我就覺得好靚嘞，嘻嘻！

呢位靚仔就係我老公啦，睇佢個樣幾咁風騷，不過佢當日係遲到架，仲要响村口拍番幾個 shot ，搞到玩新郎嘅環節要快快完成，最後出門時間亦遲咗少少！

佢手中嘅花球係我媽咪嘅契妹，即係我契姨送俾我架，比我哋自己訂嗰個花球大好多、靚好多，真係多謝晒契姨呀~

老豆陪著我，準備親手將我交比佢女婿，老豆平時唔鍾意影相架，但呢張相影得佢好慈祥、好開心呢！

經過一輪考驗後，老公終於將花球及愛的宣言交到我手上了，睇我笑得幾開心，基本上當日我係 keep 住咁嘅狀態架，差不多每張相都係笑到 over 晒，真係全世界都睇得出我幾開心、幾恨嫁呢！

老豆 & 媽咪都好開心我嫁到個好老公~

呢日真係十分、萬分多謝我班好姊妹~

Ethel 亦係當晚嘅 MC ，我係响姊妹 gathering 嘅時候先邀請佢幫手架，好多謝佢肯臨危授命，拍住同樣表現出色嘅男 MC，將我哋婚禮嘅氣氛搞得好好啊！

Jovy 、Janice & 綺琪當晚負責在 Reception 招呼賓客，佢地嘅責任真係十分重大呀，由於我哋擺成 32 圍，賓客數量真係唔少，我地仲要編好晒坐位，要派發入座咭讓賓客們對號入座，加上我地份 guest list 係去到 last moment 在酒樓至 print 出來，情況真係幾混亂下，好在佢地都好專業好有效率咁將所有難題一一擊破晒，所以我真係超級感激佢地呢！

Karine & Cathy 當日貼身照顧我，幫我戴金器、換衫、燙衫、"痴"膠紙等等，Karine 仲幫我點算金器及 keep 金器，佢地亦都係功勞都好大架~

總結：六位好姊妹都非常十分之幫得手，佢地真係完全唔計較，全心全意為我嘅婚禮付出，一心只係想搞好我嘅婚禮，等我可以開開心心咁做個靚靚新娘子，所以我真係由衷地感激佢哋每一位呢！

由右至左：Ethel、Jovy、綺琪、Karine、Janice、Cathy