唱K & 生日飯 w/Cathy@生日前夕 plus意想不到收花花

2010-02-27 (星期六)

 

生日前的一天，約咗我兩個姨甥女去唱 K ，身為壽星女嘅我竟然只係唱咗三首歌咁大把咋，真係非常之唔夠喉呢，不過其實慶祝生日只係藉口，我都係想陪下佢兩個啫，只要佢哋玩得開心就 okay 啦，唱完歌我哋食過返尋味，想去夾返幾隻公仔，不過今次冇上次咁好運啦，我一隻都夾唔到，大姨甥女就夾到一隻，哈~都叫做有啲收穫啦！

買咗幾支花返屋企插下點綴下間屋，老公返到嚟我整蠱佢話有人送花比我，嘻嘻~原來佢都買咗花送比我呀，佢話本來打算正日先送架，不過最後忍唔著提早咗送，今次係佢第一次送鮮花比我，好開心呀，以前我一直都口口聲聲叫佢唔好浪費金錢買花比我，但到真係有花收嘅時候原來真係好開心架，老公嘅呢份心意同埋愛我完全收到晒，算你啦，總算為我做返啲浪漫嘅嘢啦，有進步，要繼續努力呀~呵呵！

晚餐約咗 Cathy 去朗豪坊食飯，佢話想搵間餐廳食下嘢、傾下計，所以帶佢去一間我試過覺得啲嘢食都 okay 嘅 Suxxki café，不過呢日限定時間只得個半小時，都唔緊要啦，最多食飽去第度飲嘢繼續傾啦。

香芒軟殼蟹薄餅、芝士豆腐係我上次食過覺得好食嘅。

焗雜菌、大蝦意粉味道都唔錯，呢餐真係多謝晒 Cathy 呀，因為係同我預祝生日丫嘛~

 

之後去飲嘢，唔覺唔覺就傾到成 11:00 ，响朗豪坊影咗一陣相，佢最想影嘅財位唔知點解爆晒光，佢話仲未摸熟部機喎~ 我想用我部機幫佢影又死都唔制，真係硬頸！

 

影完相又係各自歸家的時間了，佢好體貼地先送我去搭車，仲送咗份生日禮物比我，係我最愛的 Pooh Pooh 相簿 & 小手袋， 結婚相 & Honey Moon 嘅相有地方放了，至於個小手袋，好似同我宜家嘅慣性衣著牛記笠記唔多襯噃，等我買返啲 lady 少少嘅衫或者型啲嘅衫去襯返佢先~

 

食飯期間，老公打電話嚟叫我買嘢俾佢食，皆因佢今晚留响屋企等部電話送嚟，收到就唔願再出街了，坐車返元朗時老公在12點正打比我祝我生日快樂，哈~咁叻仔冇瞓著覺嘅？真抵錫~ 返到元朗買埋腸粉、魚蛋 & 糖水返去同佢一齊食，呢餐都算係慶祝生日的第一餐啩，12點幾已經係 28號啦嘛~呵呵！

 

2010年的 Birthday Gift

2010-02-26 (星期五)

 

今日收到幾位好朋友、好同事送嘅生日禮物，佢哋都好有心思送啲好合我心意嘅東東比我 ~

 

仲有大家夾份送比我嘅生日卡，上面寫滿祝福的說話~ 大家都希望我快啲生返個 B ，其實呢個都係我生日願望嚟架，不過生虎 B 就唔得嘞，而且我亦都唔想，我最想最想就係可以生個兔B女，所以呢……下半年我哋嘅 project 就會正式展開架啦！

 

 

斑紋購物袋 + 古古力

好友 Jan Jan 每年送比我嘅禮物都好實用，呢個購物袋啱晒我呢個新紮靚太去買餸啦~ Arigatou~ Jan Jan！

 

 

Pooh Pooh 污衣籃

型女 Po Po 知我鍾意 Pooh，呢份禮物一定啱我用，話說我最近都一直物色緊污衣籃，這樣一來我就唔使自己買 lu ~ 多謝晒寶寶~

 

 

貓貓圖案耳環

好友兼好姊妹 J 知我除咗愛 Pooh 亦愛貓咪，所以佢送嘅呢兩對耳環我都好鍾意，講真我係好鍾意貓貓架，不過對於像我這種懶人，都係唔太適合養貓，因為我知道決定要養就要照顧佢一生，要付出好多嘅愛心同埋時間，所以我都係適合遠觀了，就係得閒去寵物店望下嘞~

 

夜晚返去外家同老豆媽咪食飯，點知等咗成半個鐘一架巴士都冇呀，心諗就算等到有車嚟都上唔到啦，最後打的返去~

 

食完飯攞埋部舊 modem 落樓交比媽咪，請佢幫我交比 PXXW，佢哋安排咗禮拜六嚟收返，以後每個月就可以慳番兩舊水啦~

 

返到屋企老公食海鮮仲未返，佢打電話問我要唔要買糖水我食，我問佢有冇打包鮑魚呀、瀨尿蝦比我食，佢又話冇，於是我整鬼佢話要食鮑魚糖水，佢馬上不知如何是好，哈哈，間中整蠱下佢都幾好笑架，佢有時 O 晒咀 & hang 晒機唔識反應個樣真係好鬼過癮的~呵呵~

2010 第一餐生日飯 & 計劃去泰國

2010-02-25 (星期四)

 

同事們今日提前請我食飯同我慶祝生日，Lunch 去咗飲茶，食咗好多嘢，多謝晒大家啊！

 

夜晚同老公返老爺奶奶度食飯，順便攞埋啲大相返去，老爺將我哋結婚時影嘅全家幅，同埋三少註冊時影嘅全家幅過膠，點知將三少嗰張整差咗，比三少依哦咗好耐，好在我哋仲有好多張 free 嘅 12R 相可以晒，下次再晒返比三少咪得囉~

 

食飯時講起二少去泰國，奶奶話都想睇下幾時再去泰國探下古仔阿婆 (即係奶奶媽咪)，我就建議不如 5、6月嘅時間我哋一齊去啦，咁我都可以見下阿婆丫嘛，奶奶都話好，等奶奶 4月同三少返去潮州攪掂埋結婚啲嘢就可以去了~

恭喜發財！

今年係虎年，跳跳虎一定要出下風頭啦！

祝大家虎年行大運，新年快樂，身體健康，財源廣進，心想事成！

 

挑戰新菜式~

2010-02-24 (星期三)

連續兩晚自己煮，今晚要先去買餸。。

本來老公可以幫我買，不過佢唔記得咗呢個  week 返晏放晏，而且又要去打波所以冇時間！

去到街市諗著買啲菜就走，見到豆腐突然又好想食喎，靈機一觸決定整琵琶豆腐！

買咗幾蚊豆腐同埋四兩魚肉，哈哈，誤打誤撞地又比我攪掂咗呢樣餸，而且味道都唔錯，好有成功感呀！

至於老公最愛食嘅韓式炒年糕就保持到一貫嘅水準，呢個老公都幾易滿足喎~

 

新玩具~老公送的生日禮物

尋晚老公比咗個驚喜我，佢買咗一樣我近期好想要的東東送比我做生日禮物，Yeah !! 好開心呀，多謝晒老公，我會聽你話影多啲相 o架啦  (哈哈，咁你就有難了，我嘅主要攝影對象咪就係你囉，你做好準備經常會有舊黑色物體响你眼前團團轉都得嘞~ 呵！)

CANON EF 50mm f.1.8/II 標準定焦鏡

就係呢支鏡啦，初學者必備鏡頭之一，平平哋就可以滿足我拍攝美美人像的願望，真係超抵呀~

本來打算自己買來獎勵自己，叫老公幫我格下價，但老公好抵錫話送比我，呵~我當然求之不得啦，試影咗幾張，對比起 KIT 鏡影出來的相真係 Sharp 好多，老公話佢專業攝影師兄弟都推介呢支鏡，簡單講句就係平、靚、正！

呢個新年假期有嘢玩 lu ~ 嘻！

---

• 留言者: Canni€
• Email: cannieyuenyan@yahoo.com.hk
• 網址:
• 日期: 2010-02-26 14:31:00

我都有呢支鏡呀~~ hahha~~~ 影人靚靚靚啊!
不過定焦有少少麻煩~ 要行到好後好後~~
祝你新一年快快樂樂~~~ 甜甜蜜蜜~~~~ 幸福快樂~~~
[版主回覆02/26/2010 23:38:00]我仲未有機會用呢支鏡呀，生日要老公幫我影多啲相先~
多謝呀，也祝妳新年快樂，身體健康~

---

• 留言者: Pnv
• Email: pnvstudio@yahoo.com.hk
• 網址:
• 日期: 2010-02-21 05:48:00

50 1.8 的確好抵玩.

---

• 留言者: 愛神話的人
• Email: bbevaeva@yahoo.com.hk
• 網址:
• 日期: 2010-02-14 19:36:00

恭喜發財, 新年快樂 ^^
[版主回覆02/15/2010 17:11:00]恭喜發財, 祝新年快樂, 身體健康, 天天神話！

Relaxing Family Day~

2010-01-30 (星期六)

今日約咗媽咪同埋家姐飲茶，應承咗今次由我哋搵位，所以我地準時10點幾就出門口啦~ 見今日陽光普照，喺樓下影返張先啦，之後爭取時間由屋企坐輕鐵出市中心，坐三個站就到了~

 

哈哈，有圖為證，今次真係我哋搵位架，之前次次都比媽咪、老爺奶奶搶先一步，今次點都輪到我地啦掛~ 媽咪嚟到我即刻問佢我係咪好叻呢？媽咪笑著咁讚我叻呀，哈哈~

細姨甥女初時對鏡頭都好抗拒架，後來見我係咁狂影，佢最後都習慣咗 lu~

 

6個人叫咗10幾碟點心，呢餐茶真係飲得開心又滿足呢！

最後家姐請飲茶，佢話好耐冇請過我哋喎，嘻，咁我哋就唔客氣啦。

多謝家姐~！

 

飲完茶見老公未夠鐘返工，去咗商場行下，途經影貼紙相舖頭有得夾公仔，見到人哋好容易就夾到兩隻，於是我又叫老公試下~

老公真係勁呀，夾一次就夾到啦，只係付出 $2 就夾咗隻靚靚史迪迪，跟著送咗比細姨甥女~

 

大姨甥女都好叻，知道佢姨姨我鍾意 pooh pooh，夾咗幾次就夾到隻 pooh 袋仔比我，呢隻 cutie 袋仔可以用嚟放部相機仔喎~

 

 

日場之後就到夜場嘞，夜晚返咗6299 度食飯，寶貝侄仔 "咕唧唧" 都返咗嚟，我等埋老公一齊先行返去，去到佢已經好乖咁坐定定响度食緊飯啦，見佢手上有兩封利是，原來佢星期一開始返學喇，所以爺爺嫲嫲就封咗利是比佢，祝佢順順利利，聽教聽話~

食完飯佢又好乖地坐响佢伯伯 (即係我老公) 大腿上食生果，見佢食得津津有味真係好開心架，小朋友肯食嘢又唔扭計真係唔易，呢個一定係父母嘅功勞嚟架，二少同阿珊教得哲哲好好，當然姐姐阿田亦都功不可沒啦~

睇嚟我哋都要好好學習下啦，希望我哋第時個 B 都好似佢咁乖就好啦~

 

返去食飯前在萬寧買咗個 pooh pooh 全盒，裡面有啲糖不過唔知好唔好食，結婚後第一次過年，應節嘢點都要準備下，派利是嘅新銀紙都準備緊架啦，好期待第一次派利是啊~

 

同場加映：

今日終於去咗搞搞個頭，結婚前已經想拉直佢架啦，不過聽人講拉直咗 set 頭會冇咁好，所以忍到宜家先去整，哈哈，係咪好似後生咗咁呢？

其實我知老公鍾意我鬈髮多啲嘅，不過我之前已經 keep 著鬈髮一段時間了，所以……下次先再電鬈啦，話唔定會剪短晒佢添架~ 呵呵~

 

---

• 留言者: ♡°。黑豬安。°♡
• Email: cutieringo715@yahoo.com.hk
• 網址:
• 日期: 2010-02-01 18:44:00

咦?我同你...應該都係新界西既人喎
[版主回覆02/02/2010 08:54:00]係呀，我住元朗架~