懷孕後收到第一份禮物 (from 小古B's 未來契媽)

2011-05-10 (星期二)



今日係佛誕，但係我無假放，因為公司放勞工假。。

朝早出門口搭車，條街靜過鬼，真係好少見。。



午飯前，媽咪打電話嚟話我知佢哎吔契女 阿 Ling 食炸糊呀，之前話經期遲咗成 10日，仲諗著佢好大機會有喜添，不過唔緊要啦，要繼續努力呀，保養好個身體，BB 好快就會嚟架啦。。



小古 B 嘅未來契媽今日過咗嚟同我食  Lunch ，仲送咗條孕婦褲 & 保溫杯套裝比我，呢份係我有咗 BB 之後收到嘅第一份禮物呀，真係多謝晒呀未來契媽。。契媽仲話 BB 出世之後，禮物會陸續有來添呀。 佢話要將 BB 變成 Pooh Pooh 喎。想像一下，如果 BB 似我哋兩公婆咁，都係頭大大的話，打扮成阿 Pooh 咁都幾搞笑喎 ^^



放工終於去買咗四套新的  Underwear ，因為有咗嘅關係，我已經開始變咗有料之人啦，依家買大一個 Size，可以著得舒服啲啦。。

Shopping 完唔想返屋企煮，去咗吉野家食埋飯先返去，爽呀。



老公放工返嚟，佢話今日終於搵到叔叔，問咗佢意見， 叔叔都覺得佢哋可以買套票自己去泰國玩幾日 ，因為反正佢都唔想去芭提雅，如果跟團嘅話就多數都會去一日架，老公話咗比叔叔知我今次唔方便去啦，佢話叔叔已經意會到，仲恭喜我哋添。其實如果我唔係有咗嘅話，我都好想同佢哋一齊去泰國探下阿婆架，正如奶奶所講，阿婆年紀已唔細，可以探得一次就一次架啦，我當然希望阿婆可以長命百歲啦，咁第時我哋可以一家三口過去探佢，比佢見下個曾孫啦。