2011-05-05 (星期四)
今日第一次去屯門醫院做產檢，約咗 1:30，老公幫我排隊攞咗 9 號籌，見姑娘前先去聽咗一個關於唐氏綜合症嘅講座，聽完之後就等照超聲波。
今日幫我照超聲波嘅姑娘好好人呀，當照到 BB 心跳時，佢好親切又開心咁話比我知，呢個就係BB 心跳啦，見到BB嘅心跳閃下閃下咁，嗰一刻，懷孕嘅感覺變得更真實，一個小生命正喺我肚裡面一日一日咁成長，我嘅責任亦大咗，因為我要好好保護佢丫嘛。。
姑娘再量度埋胎兒嘅長度，確定同馮醫生幫我計算嘅預產期吻合，一切順利嘅話，BB 將會喺 12月19日出世。。
約埋時間喺 6月8日返嚟做唐氏綜合症篩查，到時可以再見到 BB，照超聲波幫 BB 度頸皮同埋抽血驗，兩個星期後就會知道 BB 係咪高風險啦，雖然話高齡產婦有 400分之一機會中，但係我哋都好有信心，BB 一定會健健康康咁嚟到呢個世界嘅。。
沒有留言:
張貼留言