34 week 4 day 第十次政府產檢

2011-11-11 (星期五)

6條1....好好日子的一天，
好多人喺今日結婚，睇新聞話有成千幾對新人今日行禮呀，
呢個日子的確係幾特別嘅，第時想唔幾得邊日係結婚週年紀念日都幾難啦！

但今日對我嚟講就唔係話好特別啦，
都係兩星期一次嘅產檢啦，
9:00 去到健康院，
都係磅重、驗小便、量血壓咁‧‧‧
今次我叻咗呀，血壓一次就 pass，其他都正常啦，
之後聽咗個講座，內容大致係入院需知 & 母乳餵哺簡介咁，
姑娘話今日直接見醫生，醫生檢查完後，無問題就繼續喺健康院做檢查直至生 BB，
有問題就會轉介去醫院跟進，
嚟緊 36 week 起就要每個星期返嚟做檢查，
今日之後，排版亦會交返比我哋自己 keep ，因為 37 week 就算足月架啦，
隨時生得都未定，所以份排版都要每日跟身咁話，
原來，真係話咁快就陀咗咁耐了，
如無意外，下個月就做媽媽啦，
開始有啲緊張啦，
阿囡，要乘乘地，長多少少肉，响媽媽肚肚住到足月先好出嚟呀知道嗎？


檢查完，同老公行咗一陣千色店，
左揀右揀下，終於揀到條揹帶了，雖然初生無咁快要用到，
但係因為係婆婆指定要送比粒孫嘅，仲要滿月當日攞過來給我們的，
咁我老公大人又話要自己揀嘞，所以就買定先，之後再問媽咪攞番錢，當係佢送啦。。
多謝婆婆啊！