同未來老爺奶奶飲茶 & 煮飯仔

今朝早同未來老爺奶奶、叔仔、姑仔&男友一齊飲茶，見到未來叔仔 (三少) 終於可以親口恭喜佢啦，因為佢會喺8月註冊結婚，出年再行傳統嘅儀式，即是古古又俾佢細佬爬頭啦，前幾年已經比二少爬咗頭，二少個仔都歲幾就嚟兩歲嚕~

未來奶奶仲同我講笑，話我遲下就係大少奶啦！

飲完茶我哋一行五人去上水探二少個 B ，去到佢屋企咁啱阿 B 瞓咗，但我哋坐咗一陣佢已經醒啦，可能因為未瞓醒初段時間佢連爺爺嫲嫲都唔跟，淨係跟著工人姐姐咋，後來玩熟咗就開始講啲外星語同埋响間屋跑來跑去不知幾開心呀！

離開佢屋企嘅時候佢知道我哋要走，猛攬住佢爺爺唔肯落地，最後跟埋我哋落樓姐姐氹佢話爺爺要揸車抱唔到佢，佢先至肯比返姐姐抱咋，宜家啲小朋友真係好醒目呢！

* * * * * * * * * * * * * * * * * * * * * * * * * * * * * * * * * * * * * * * * * * *

夜晚嗰餐在家玩煮飯仔，有古古鍾意食嘅炒年糕，簡簡單單嘅煎雞翼同埋三色椒，兩條友仔仲開咗支白酒飲，飲完之後勁眼瞓呀！