2011-02-28 快樂生辰

2011-02-28 (星期一)

 

又到生日嘅開心日子。

呢日攞咗一日假慶祝。

其實都乜特別地方去架。

我只係想簡簡單單，同老公過下二人世界，已經好開心，好滿足啦。。

 

去咗 " Savour Cafe 品味 " 食 Lunch ，係我要求嘅，因為呢間意大利餐廳喺元朗係出名貴架 (我都係睇 openrice 知道嘅) ，所以選擇喺特別日子去食 Lunch ，抵食好多。。。(老公我算係咁啦掛，識幫你慳錢‧‧)，其實並唔係因為佢貴先揀佢嘅，都係因為好多人讚呢度啲嘢好食，我同老公又喜歡食牛扒，所以先揀呢度試下啦，晚餐就唔會嚟呢度食啦，我哋都唔係要食啲貴夾唔飽嘅嘢啦。話說回來，間中食下啲好嘢係一種享受嚟架，當然仲要睇下同邊個食啦。。

 

入面嘅環境唔錯，地方唔係好大，大概有10張檯左右啦，outdoor 都有 4、 5張檯嘅，不過對著條渠‧‧‧點都係室內坐得舒適啲。。

 

  


蘑菇忌廉湯 ‧‧ 番茄濃湯‧‧蒜蓉包‧‧

 

好享受同老公去唔同嘅地方試食‧‧‧

 

 羊肉 & 西冷牛扒，兩樣都好好味，唯一美中不足係我地掛著影相，到食嘅時候已經攤凍咗啦。。。

 

老公用隻叉同醬汁，喺碟邊即場親手寫給我的 Happy Birthday，好 Sweet 呀！

要讚下呢度嘅經理，佢主動幫我地影合照，仲提我地拎著水杯影會靚啲，服務態度真係好得。。

 

 

食完  Lunch ，下一個節目都係我提議嘅，因為晚餐會返屋企煮，所以唔想去太遠嘅地方，於是近近地去錦田鄉村俱樂部睇兔仔。。

呢個地方未結婚前都來過，有得釣魚、BBQ、摘士多啤梨，仲有一大片草地，最適合帶小朋友黎放電啦，將來我哋有小朋友嘅話，假期都可以帶佢黎呢度行下呀。佢最好就係唔收入場費丫嘛，又近~ 

 

見到我喜愛的兔兔啦，其實，小動物黎講，我最鍾意係貓啦，不過小白兔都一樣咁可愛，加上今年又係兔年添，所以我都要帶埋兔兔 Pooh 黎探下啲朋友仔啦。。 

 

 

 

下面上圖呢隻松鼠真係好嘈，係咁吱吱吱叫，又咬個鐵絲網，睇佢個樣實係以為我地喂佢啦，真係為食鼠！！

 

  

呢隻 pooh pooh 兔係老公送比我嘅情人節禮物，好鍾意呀！所以今日都要帶埋佢出黎啦！

 

 老公 >> 我哋以後都要形影不離呀

正所謂：嫁雞隨雞、嫁狗隨狗、嫁著馬騮通山走丫嘛，哈哈！

 

 

 

就係呢片大草地啦，好期待將來帶埋我哋嘅小朋友嚟呢度四圍跑呀！

 

 

號稱全港最大嘅士多啤梨園，有好幾個品種。

我哋無摘啦，今日淨係想行下影下相咋~

 

 

 

呢度就算唔摘都可以入場行下影下相真係唔錯，唔似好多士多啤梨園要比入場費先可以入去。

 

 

 

除咗士多啤梨，呢度仲有好多其他農產品，真係應有盡有！

 

 

 

行到入口附近，有兩隻山羊喺度食緊草，小妹妹又唔知喺邊度摘咗啲草嚟喂佢，後來佢仲教我哋邊度有草摘添。。

 

 

 

行完鄉村俱樂部，我哋順路又去埋樹屋度行下，

呢棵榕樹真係十分巨大啦。。

 

 

 

兩個大唔透嘅人同小朋友爭嘢玩，哈哈，仲好似玩得好開心咁喎！！

 

 

* * * * * * * * * * * * * * * * * * * * * * * * * * * * * * * * * * * * * * * * * * * * * * *

 行到咁上下，又係時候準備今日嘅晚餐啦。

先去 supermarket 買長法包、南瓜、配菜等。。

再去專門店買咗兩塊靚扒。

今晚又係由大廚親自下廚。。

 

 

 南瓜忌廉湯‧‧蒜蓉‧‧頂級牛小排‧‧十分豐富又美味的晚餐。。

 

 

老公更少有地送花比我。。氹得我好開心啦。我好容易滿足架咋！

另外又送咗個手袋比我做生日禮物。好鍾意呀。。

 

老公成日話無乜特別節目安排比我，唔似我有心思。。

其實我好想話比你知，只要我哋生活得開開心心，你永遠喺身邊支持我、愛護我，咁就已經好足夠啦。有了你，就是我一生最大的幸福！！

 

 

 

好姊妹 Cat Cat 送我的生日禮物：化妝袋、Lip Balm 、手蠟機。

 

同事 Po Po 送的 Pooh 浴廉、浴巾。。

 

同事 Jan Jan 送的 Honey Lip Balm ，佢祝我永遠甜甜蜜蜜呀，多謝晒，完全收到~

仲有好多同事寫上祝福說話嘅生日咭，多謝晒咁多位嘅祝福！

 

 

 

同事 I 送嘅 Pooh Pooh 公仔，識行架，不過我仲未買到電芯，未試佢係咪真係識行 & 行成點呢。。

 

* * * * * * * * * * * * * * * * * * * * * * * * * * * * * * * * * * * * * * * * * * * * * *

過埋今日又大一歲啦，我今年嘅生日願望相信好多朋友都知道啦，希望能早日願望達成啦。

心存盼望、不氣餒，我好有信心，我哋一定會成功的！！