2011-04-30 第一次私家產檢

2011-04-30 (星期六)

兩個星期前 Book 咗馮醫生今日 2:30pm 第一次私家產檢，後來老公幫我喺政府排咗 5月5日做檢查，其實私家產檢可以改期架，但係我又心急想快啲見到 BB 喎，所以今日都係照去檢查啦。

行去診所途中，老公竟然話有少少緊張喎，真係估佢唔到，一直以為只有我一個人咁緊張添 ^^

等咗半個鐘終於到我啦，醫生問咗我少少資料，係咪第一胎，第一時間就話…高齡啦喎…… 我只有答佢係啦。

跟著瞓上床照超聲波，醫生話我唔夠急尿，所以照得唔太清楚，佢問我要唔要照埋陰超，照陰照嘅話會清楚啲，由於之前已經問過老公介唔介意我搵男醫生，老公話咗唔介意嘅，咁我就決定照埋陰超啦，照到出嚟原來 BB 仲係好細咋，隱約見到佢嘅心跳閃閃下咁，真係好奇妙呀，一個小生命已經喺我肚裡面孕育緊啦!!  醫生話度 Size 結果顯示胎兒只有 1cm 左右，大約係 6.5 週咋，所以預產期就由原來嘅 12月4日 改為 12月19日啦，佢推算我應該係 3月底先成孕架。

埋單費用 $580 包埋維他命丸，因為我一早已經食緊葉酸，所以佢無再開比我。

檢查完之後，老公就立即趕出去會展幫阿姨手整嘢，我就去買餸。

晚餐自己煮咗兩味餸：糖腊排骨、西蘭花炒雜丸，等埋老公返嚟一齊食 ^^