2011-04-11‧‧醫務所驗孕

2011-04-11 (星期一)

 

上星期五知道自己 bingo 咗之後，就同老公商量好下星期一請半日假去睇西醫，確認下係咪真係中咗。

10:00 幾去到家庭醫生鄧醫生嘅醫務所，留小便驗孕，醫生唔知係咪替我緊張呢，佢竟然一滴落去就立即睇結果喎，明明說明書教起碼要等兩分鐘架嘛 (佢用嘅捧捧同我自己買嗰隻係一樣架，所以我已經識得點用啦)  仲要同我講話無添，吓？？？ 無可能架喎，我自己 check 咗三次都係 positive 喎，之後佢再睇真啲就話有啦，但係就好淺色啦，我同佢講我近呢幾個月 period 個期都唔準呀，佢都話有機會係我啲期亂晒，可能係剛剛成孕所以先咁淺色，不過已經肯定係有咗嘅，佢寫咗張證明書比我，建議我一星期後自己再 check 多次，如果想再更肯定啲，最好就係去睇婦產科照超聲波啦。

離開咗醫務所後，見未夠鐘返工，就叫老公陪我去婦產科醫生度視察下，攞咗張卡片，諗著政府同私家兩邊都做檢查，希望兩邊互補不足啦，始終政府醫院未必每次都會照超聲波丫嘛。。跟著去埋健康院度查詢下，原來係要帶住址證明預約呢，今日無帶呀，唯有叫老公過兩日黎幫忙預約啦。

老公送我去坐車，喺巴士上我急不及待打電話將喜訊通知媽咪，我同佢講食糊啦，媽咪竟然唔信喎？？ 可能因為上兩個月我又係以為自己有機會中，同佢講 "叫" 緊糊，點知最後食炸糊，佢以為我今次又比希望佢啦。。媽咪表面上好似好平靜咁，其實我知道佢都好開心啦，佢都係叫我事事要小心啦，唔好咁粗心大意。。

至於老爺奶奶嗰邊，我就叫老公通知啦，老公打電話比奶奶，話有好消息講比佢知，奶奶即刻哈哈笑啦，又恭喜我哋。。今次我哋終於成功咗，奶奶都好有功勞架，上個月佢哋兩老去萬佛寺旅遊時，有幫我們拜過送子觀音呢，佢哋嘅呢份心意同埋祝福，相信我肚裡的寶寶已經接收到啦。。好多謝家中四大長老一直都沒有壓力給我，讓我可以開開心心地迎接寶寶嘅來臨，真係好感恩啦！

返到公司，好姊妹非常關心地問我今朝去咗邊，呵~緊係唔講住啦。。點知佢走嚟我位度搵嘢食，無意中搭著我膊頭喎，我好自然反應咁縮開啦，老一輩嘅人話唔好搭膊頭架嘛，佢真係醒見我咁大反映即刻 sense 到，估中我已經有咗啦，佢嘅反應比我老公更興奮呀，當然啦，呢位好同事兼好姊妹可以話係睇著我長大架，由我畢業後就入咗呢間公司做嘢，一直做到今時今日，當時係佢負責 Interview 架，之後喺我上一段感情遇到種種難題嘅時候佢都比好大的支持及安慰我，直到我遇到我老公，過著開心快樂的日子，再決定結婚，佢義不容辭咁幫我做姊妹，為我送上無限嘅祝福；到依家我有埋 BB，真係感受到佢係真心替我高興架。。曾經，我哋喺公事上有好多磨擦，我唔係咁認同佢嘅處事方式同埋過份執著嘅性格，有一段時間我哋之間變得比較疏離，後來經過溝通了解後，關係又變返好似以前一樣咁密切啦，我承認我嘅朋友並唔多，但係好慶幸自己總有幾個可以交心嘅知己。。

有些人，你會知道係唔能夠同佢講太多內心的說話，因為你永遠唔會知道佢幾時會突然間變得討厭你。。又有些人，口口聲聲話自己唔鍾意同人比較，成日覺得別人要鬥贏佢就會好開心，硬要堆砌一些罪名給人才安樂，其實真係唔知佢明唔明，根本就無人要同佢比，亦無需要去比啦。。  有人話，其實呢類人係最唔抵得別人比佢好的，佢先係最鍾意同人比較，更甚的是佢總喜歡抬高自己去踩底別人，所以呢一種人，並唔係我可以真正交心嘅朋友呢，能否繼續做朋友就平常心吧，反正人家早己認定你是衰人了，無謂去解釋或澄清什麼，佢開心就得啦。

對於我嚟講，我只係想開開心心咁享受我嘅家庭生活、婚姻生活，最重要就係同寶寶一齊努力、用心去感受寶寶帶給我這寶貴的 280天美麗日子啦！